Акцыя на Дзень Волі пачнецца каля Акадэміі навук
Аргкамітэт па адзначэнні Дня волі ўчора прыняў рашэнне падаць заяўку на правядзенне вулічнай акцыі 11 лютага.
Як паведаміў БелаПАН намеснік старшыні руху "За Свабоду" Юрась Губарэвіч, у пасяджэнні ўзялі ўдзел прадстаўнікі Партыі БНФ, Аб'яднанай грамадзянскай партыі, аргкамітэта па стварэнні партыі "Беларуская хрысціянская дэмакратыя", "Маладога фронту" (зарэгістраваны ў Чэхіі), кампаній "Гавары праўду!" і "Еўрапейская Беларусь".
Вырашылі, што акцыя пачнецца 25 сакавіка а 18 гадзіне каля Нацыянальнай акадэміі навук. Працягнецца яна шэсцем да сквера Янкі Купалы, дзе мае адбыцца мітынг.
Губарэвіч выказаў сумнеў, што Мінгарвыканкам дасць афіцыйную згоду на заяўлены маршрут акцыі. Разам з тым палітык спадзяецца, што "вялікая колькасць удзельнікаў і перамовы з уладамі дадуць магчымасць правесці мерапрыемства паводле распрацаванага плану".
Асноўныя мэты акцыі — прыцягненне ўвагі да праблемаў палітзняволеных, барацьбы з іншадумствам і незалежнасці краіны.
