Апазіцыя “актыўна дамаўляецца” пра адзінага кандыдата ў прэзідэнты
Пра гэта паведаміў старшыня Партыі БНФ Аляксей Янукевіч на сойме арганізацыі 12 красавіка.
Паводле яго словаў, існуе праект вызначэння такога кандыдата праз правядзенне кангрэсу дэмакратычных сіл. Янукевіч сказаў, што цяпер абмяркоўваюцца розныя варыянты вылучэння дэлегатаў розных арганізацыі і кангрэсу дэмсілаў, перадае БелаПАН.
Палітык мяркуе, што на сёння ў дэмакратычных сіл будзе рэсурс, каб сабраць подпісы для вылучэння толькі двух кандыдатаў у прэзідэнты. “Хоць было б лепей, каб адзіны апазіцыйны кандыдат быў адзін. Нашы намаганні павінны быць скіраваныя на вызначэнне менавіта такога кандыдата”, — сказаў Янукевіч.
На думку лідара Партыі БНФ, гэты кандыдат павінен прытрымлівацца “ясных геапалітычных поглядаў”: “Нельга дапусціць, каб такі кандыдат раіўся ў важных пытаннях з Расіяй, як пра гэта нядаўна заяўляў Лукашэнка”. Адзіны кандыдат ад апазіцыі павінен адстойваць беларускую незалежнасць.
