Брытанскі таблоід закрылі за незаконную праслушку
10 ліпеня выйшаў у продаж апошні нумар газеты News of the World. “Дзякуй і бывайце!” — кажа рэдакцыя сваім чытачам на першай паласе нумара.
Уладальнік таблоіда медыямагнат Руперт Мердак быў вымушаны яго закрыць пасля скандалу з незаконным праслухоўваннем тэлефонаў. Супрацоўнікі выдання наймалі дэтэктываў, каб праслухоўваць размовы знакамітасцяў, а таксама ахвяраў тэрактаў ды іншых злачынстваў. У развітальным слове да чытачоў журналісты газеты прынеслі ім свае прабачэнні, перадае ВВС.
Самы масавы брытанскі таблоід праіснаваў 168 год. У выніку яго закрыцця, як чакаецца, працу страцяць каля 200 чалавек.
