Буш паабяцаў Мілінкевічу дамагацца вызвалення беларускіх палітвязняў

Прэзідэнт Злучаных Штатаў Амерыкі Джордж Буш учора сустрэўся ў Празе з Аляксандрам Мілінкевічам, лідэрам грамадскага руху «За Свабоду».  Сустрэча мела нефармальны характар. Буш пацікавіўся ўнутрыпалітычнай сітуацыяй і праблемамі парушэння правоў чалавека ў нашай краіне. Прэзідэнт ЗША «цвёрда паабяцаў і ў далейшым падтрымліваць дэмакратычныя працэсы ў Беларусі, абараняць правы чалавека і дамагацца вызвалення палітвязняў».

Нагадаем, 5-6 чэрвеня Аляксандр Мілінкевіч прымае ўдзел у міжнароднай канферэнцыі «Дэмакратыя і бяспека». Яна праводзіцца напярэдадні саміта краін «вялікай васьмёркі» і прысвечана дзейнасці ў падтрымку працэсаў дэмакратызацыі ў краінах з аўтарытарнымі і таталітарнымі рэжымамі.

Па яе выніках будзе прыняты адмысловы «Пражскі дакумент». Мілінкевіча ў Прагу запрасілі Вацлаў Гавел і Натан Шчаранскі.

БелаПАН