ФК "Дынама-Мінск" стварае клуб фанатаў, каб пазбегнуць фашыстоўскіх выхадак

Мінскі футбольны клуб "Дынама" ў бліжэйшы час плануе зарэгістраваць грамадскае аб’яднанне "Клуб заўзятараў "Дынама". Пра гэта Еўрарадыё распавяла вядучая па маркетынгу і рэкламе клуба "Дынама-Мінск" Алена Сняжко. І адной з мэтаў клуба фанатаў будзе "правільная падтрымка дынамаўцаў". Такім чынам дынамаўцы спадзяюцца засцерагчы сябе ад фашыстоўскіх выхадак фанатаў падчас матчаў:

Сняжко: "Зараз у нас каля 2000 яўных заўзятараў. І мы хочам стварыць грамадскае аб’яднанне "Клуб заўзятараў "Дынама". Плануем вылучыць ім памяшканне, забяспечыць арганізацыйным абсталяваннем. Узгадняць будзем з імі ўсе акцыі, якія будуць адбывацца на стадыёне. Узгадняць паездкі заўзятараў разам з намі на выязныя матчы. Асноўная функцыя клубу – баленне. Правільнае баленне, правільная падтрымка клубу. Хочацца засцерагчыся ад нядобрых акцыяў, якія былі".

Сняжко таксама распавяла, што пакуль мінскі футбольны клуб ладзіць сходы з заўзятарамі. І не так даўно па жаданні фанатаў былі зніжаныя кошты на абанементы на гульні наступнага сезону.