Хамід Карзай: Афганістан і ЗША могуць і не падпісаць дамову пра бяспеку

Ён абвінаваціў камандаванне Паўночнаатлантычнага альянсу ў тым, што за 10 гадоў ваеннай аперацыі Захад так і не здолеў прынесці яго краіне стабільнасць.

Па словах Карзая, якія перадае ВВС, кіраўніцтва NATO зрабіла памылку, сканцэнтраваўшы свае высілкі па пошуку баявікоў у афганскіх вёсках і не надаючы ўвагі сховішчам талібаў у Пакістане.

Кіраўнік Афганістана заявіў, што яго першачарговай задачай на сёння з'яўляецца забеспячэнне міру і стабільнасці ў краіне, у тым ліку за кошт дамовы пра частку ўлады з талібамі. Урад цяпер вядзе актыўныя перамовы з радыкальнымі ісламістамі. Па словах Карзая, там, дзе прадстаўніка талібаў можа прызначыць на дзяржаўную пасаду прэзідэнт Афганістана ці ўлады краіны, такое прызначэнне адбудзецца. Пры неабходнасці выбараў талібам давядзецца ўдзельнічаць у іх.

Карзай будзе знаходзіцца на пасадзе прэзідэнта яшчэ шэсць месяцаў, пасля чаго павінен быць абраны яго пераемнік.

Яшчэ да будучых прэзідэнцкіх выбараў у Афганістане ЗША хочуць канчаткова аформіць з Кабулам двухбаковую дамову пра бяспеку. На 2014 год з Афганістана прызначаны канчатковы вывад войскаў NATO. Штаты хочуць бачыць подпіс Карзая, бо іначай лёс дакументаў можа стаць закладнікам перадвыбарнай барацьбы.

Тым часам афганскі прэзідэнт заявіў, што не спяшаецца падпісваць дамову з Вашынгтонам.

Фота — AFP