Кіраўнік Віцебшчыны палічыў апазіцыйных кандыдатаў нявыхаванымі
Аляксандр Косінец заклікаў журналістаў падтрымаць кандыдата ў прэзідэнты Аляксандра Лукашэнку, чыёй даверанай асобай ён з’яўляецца.
Заклік прагучаў на прэс-канферэнцыі, прысвечанай вынікам двухгадовай працы Косінца на пасадзе кіраўніка вобласці.
Гаворачы пра альтэрнатыўных кандыдатаў, Косінец адзначыў, што ён бачыць “пытанні з іх выхаваннем і культурай”. На думку чыноўніка, нават калі кандытаты дрэнна ставяцца да Лукашэнкі як да чалавека, яны павінны паважаць яго як дзейнага прэзідэнта і таму не маюць права рэзка выказвацца пра яго дзейнасць у сваіх перадвыбарчых выступах.
Мінусамі альтэрнатыўных кандыдатаў Косінец лічыць таксама тое, што амаль ніхто з іх не мае ані досведу кіравання вялікімі вытворчымі калектывамі, ані высокіх даходаў.
