Міліцыянт затрымаў пенсіянера, які... выклікаў міліцыю

"На сябе" выклікаў міліцыю 69-гадовы жыхар вёскі Перадзел Ганцавіцкага раёна. Пасварыўшыся з жонкай і шваграм, пенсіянер патэлефанаваў у міліцыю і паскардзіўся на сваякоў. Прыехаўшы ў вёску, участковы ўбачыў, што мужчына нецвярозы. У хаце добра пахла брагай. Міліцыянт знайшоў 40 літраў гэтага напою ў хляве ў дзвюх біклагах. Пенсіянер сказаў, што гэта жончыны запасы, але тая адказала, што не п’е. У выніку гаспадар прызнаўся праваахоўніку, што бражка яго і ўжывае яе ён сам.

Цяпер, як паведамляе газета “Ганцавіцкі час”, гаспадару пагражае штраф да аднаго мільёна пяцідзесяці тысячаў рублёў.