Невядомыя пашкодзілі аўтамабілі каля сядзібы Мілінкевіча ў Берштах

Два аўтамабілі былі пашкоджаныя каля сядзібы палітыка Аляксандра Мілінкевіча ў Берштах у Шчучынскім раёне.  Здарэнне адбылося ў ноч на 5 ліпеня. У абедзьвюх машынах былі прабітыя чатыры колы. У гэты час Мілінкевіч разам з сям’ёй быў у хаце. Суседзі бачылі немясцовыя аўтамабілі з падазронымі людзьмі.

На нядзелю 6 ліпеня ў Мілінкевіча былі запланаваныя сустрэчы з будучымі кандыдатамі ў Палату прадстаўнікоў. Менавіта гэтым планам, на думку палітыка, і спрабавалі перашкодзіць "невядомыя".

"Наша ніва" нагадвае, што падобным чынам ў красавіку спрабавалі сарваць сустрэчы Аляксандра Мілінкевіча з жыхарамі Мастоў і Гродна. Тады былі пашкоджаныя чатыры машыны ў двары дома. А на месцы здарэння засталіся сляды вайсковых берцаў.