Палітолаг: Для Беларусі лепш, калі польскія выбары выйграе Качыньскі

Польская перадвыбарчая кампанія паступова набліжаецца да свайго лагічнага завяршэння. У сераду, 30 чэрвеня, кандыдаты ў прэзідэнты апошні раз сустрэліся ў тэледэбатах. Тэмамі для абмеркавання сталі сацыяльныя справы, эканоміка і замежная палітыка. Як падлічылі польскія журналісты, Браніслаў Камароўскі часцей за ўсё казаў пра Польшчу, гэтае слова з яго вуснаў прагучала ажно 53 разы. А вось Яраслаў Качыньскі 39 разоў узгадаў пра “дзяржаву” і 29 пра “законнасць”. 

Браніслаў Камароўскі, якога часта называюць марыянеткай польскага прэм’ера Дональда Туска, стараўся пераканаць сваіх выбаршчыкаў, што будзе незалежным і актыўным прэзідэнтам. 

Браніслаў Камароўскі: “Я, напэўна, не буду рабіць справаздачу прэм’еру, што я зрабіў тое і тое, як гэта здарылася з папярэднім прэзідэнтам. Таму што прэзідэнт павінен дзейнічаць аўтаномна і быць незалежны. І такое бачанне непартыйнага прэзідэнцтва я сёння ўжо рэалізую, гэта бачна на прыкладзе Рады нацыянальнай бяспекі і Нацбанка”. 

Гэтае выказванне вельмі абурыла Яраслава Качыньскага. Кандыдат у  прэзідэнты лічыць, што ягоны загінулы брат Лех усё рабіў правільна, таму Яраслаў працягне яго палітыку. 

Яраслаў Качыньскі: “Лех Качыньскі быў самастойным палітыкам, дзякуючы якому я прабіўся. Я буду працягваць рацыянальную палітыку, такую, як праводзіў мой брат. Трэба шукаць месца Польшчы на ўсходзе, між іншым у добрых адносінах з Расіяй, і пераносіць гэта на Захад. А там дбаць, каб Польшча сапраўды насамрэч была лідэрам”.

А вось пра нашу краіну польскія кандыдаты ў прэзідэнты ўзгадалі толькі раз — Браніслаў Камароўскі паўтарыўся, што пра беларускія справы нельга размаўляць з Масквой. Аднак гэта не выклікала вострай рэакцыі яго праціўніка. Як паведаміў Еўрарадыё палітолаг Андрэй Казакевіч, падобныя выказванні гэта проста перадвыбарчая рыторыка. Насамрэч у галіне замежнай палітыкі погляды кандыдатаў па сутнасці аднолькавыя, таму і пасля выбараў польскае стаўленне да Беларусі не зменіцца. Тым не менш, на думку Андрэя Казакевіча, прэзідэнт Качыньскі быў бы для нашай краіны крыху лепш, чым Камароўскі.

Андрэй Казакевіч: “Напэўна Качыньскі быў бы лепшы, але толькі ў тым кантэксце, што быў бы нейкі баланс у польскай палітыцы. А баланс дапамагае прымаць больш узважаныя рашэнні. А калі адна палітычная сіла дамінуе і ва ўрадзе і на пасадзе прэзідэнта, то гэта робіць палітыку менш збалансаванай і стратэгічна прадуманай. Такі расклад быў бы больш спрыяльны для нас у кароткай і сярэдняй часовай перспектыве”.

Аднак па выніках тэледэбатаў пакуль лідыруе Браніслаў Камароўскі, як сведчаць польскія інтэрнэт-апытанні. Ці ператворыцца гэтая папулярнасць у галасы выбаршчыкаў казаць пакуль рана. Тэарэтычна, вынік выбараў мусіць вызначыць электарат Гжэгажа Наперальскага, кандыдата ад лявіцы, які ў першым туры набраў больш за 13% галасоў і заняў 3-е месца, аднак у другі тур ужо не патрапіў. Сам палітык доўга думаў, каго ж яму падтрымаць — Качыньскага ці Камароўскага — аднак нічога так і не вырашыў.

Гжэгаж Наперальскі: “Мае выбарцы гэта адказныя і свядомыя людзі. Ім я і пакідаю выбар 4 ліпеня, ім я пакідаю гэтае рашэнне. Яны і самі дакладна ведаюць, якой Польшчы хочуць. Сёння я магу прасіць іх толькі аб адным, каб нашая супольнасць была грамадзянскай. Не важна, якое рашэнне яны прымуць. Але мы ўсе будзем грамадзянамі і 4 ліпеня сустрэнемся каля выбарчых урнаў і прагаласуем”.

А пакуль Гжэгаж Наперальскі прымаў гэтае рашэнне, польскія інтэрнэт-карыстальнікі змагаліся за яго падтрымку ў перадвыбарчай камп’ютарнай гульні — “Перацягні Гжэся”.

 Правілы гульні вельмі простыя. Пасярэдзіне экрану стаіць Гжэгаж Наперальскі і трымае за рукі Яраслава Качыньскага і Браніслава Камароўскага. З іх трэба выбраць аднаго і хутка націскаць стрэлачкамі на клавіятуры ў яго бок. Каму ўдасца перацягнуць Наперальскага, той і выйграў. Праўда, варта адзначыць, што Браніславам Камароўскім гуляць чамусьці крыху лягчэй чым яго праціўнікам.

Фота: gazeta.pl, facebook.pl, se.pl