Плешчаніцы, Смалявічы і Дзяржынск могуць наблізіцца да космасу

Пляцоўка для размяшчэння беларускага Цэнтру кіравання палётамі ў космас будзе выбрана ў красавіку-траўні бягучага года. Пра гэта "Інтэрфаксу" паведаміў Міхаіл Мясніковіч, старшыня прэзідыюму Нацыянальнай акадэміі навук.  Паводле яго словаў, цяпер разглядаюцца тры раёны: Плешчаніцы, Смалявічы і Дзяржынск. Адно з патрабаванняў да размяшчэння Цэнтру - гэта знаходжанне яго на ўзвышанасці.

Раней ужо паведамлялася, што кіраванне новым беларускім спадарожнікам, стварэнне якога плануецца завяршыць да канца 2009 года, будзе здзяйсняцца выключна з тэрыторыі нашай краіны.