Пракуратура пакуль не знайшла вінаватых у выбуху на "Пінскдрэве"

У выніку выбуху і пажару на "Пінкдрэве" памерлі ўжо пяць чалавек. Яшчэ сямёра працаўнікоў фабрыкі застаюцца ў рэанімацыі ў крайне цяжкім стане. Усяго ж у шпіталях Мінска, Брэста і Пінска знаходзіцца 15 пацярпелых.

"Хто знаходзіцца ў рэанімацыі — вельмі цяжкія хворыя. Цяжка сказаць, якія шанцы. Траўмы вельмі цяжкія, глыбокія апёкі, таму штосьці прагназаваць загадзя вельмі складана. Ва ўсіх, хто ў рэанімацыйным аддзяленні, апёкі звыш за 50% паверхні цела", — распавёў Еўрарадыё намеснік галоўнага ўрача мінскай Лякарні хуткай дапамогі Ігар Шыманскі.

У сталіцы цяпер знаходзяцца 9 чалавек. Стан шасцярых лекары называюць вельмі цяжкім. У Брэсцкім шпіталі ратуюць жыцці яшчэ пецярых. Медыкі не даюць ніякіх прагнозаў.

“Я прагнозы не раблю. Цяжкі стан, сур’ёзна цяжкі”, — кажа намеснік галоўнага лекара Тадэвуш Гарасімчык.

У Пінскай цэнтральнай лякарні застаўся адзін пацярпелы. Супрацоўніцу “Пінскдрэву”, якая ляжала ў нейрахірургічным аддзяленні, сёння выпісалі, кажа галоўны лекар Віктар Асачук.

Віктар Асачук: “Адзін пацыент учора загінуў. На ўчора ў нас было тры пацыенты. Жанчыну з нейрахірургічнага аддзялення мы выпісалі ў задавальняльным стане. Ёй больш не патрэбнае лячэнне”.

Але, на жаль, мужчына, які застаўся, — у вельмі цяжкім стане, працягвае лекар.

“Будзем казаць шчыра, крайне цяжкі стан. Мы робім усё дзеля таго, каб шанцы былі, але мы не богі”.

З нагоды выбуху на “Пінскдрэве” пракуратура Брэсцкай вобласці распачала крымінальную справу. У абласной пракуратуры карэспандэнту Еўрарадыё паведамілі, што падазроных пакуль не знайшлі. Вядзецца праверка, на месцы аварыі працуюць эксперты, распавёў следчы па важнейшых справах Аляксандр Шастачук.

Аляксандр Шастачук: “Што тычыцца прычын узгарання — пакуль нічога невядома. Працуе камісія, на месцы працуюць эксперты і спецыялісты. Адзінае, што ёсць, — колькасць пацярпелых. На сёння пяць чалавек загінулых”.

Нагадаем, выбух і пажар на “Пінскдрэве” адбыўся 25 кастрычніка. Паводле папярэдняй версіі, прычына аварыі — “выбух адкладаў драўлянага пылу ў выніку парушэння эксплуатацыі абсталявання па вытворчасці драўляна-паліўных гранул”.