Раніцай у суботу Расія атакавала захад Украіны — Луцк, Роўна, Хмяльніцкі
Атака расіян на Украіну / facebook.com/kpszsu
Раніцай у суботу 22 кастрычніка Расія атакавала заходнія раёны Украіны. Некалькі выбухаў адбылося ў Луцку — у некаторых раёнах горада цяпер адсутнічае электрычнасць. Абстрэлу падвергнуўся Роўна — паведамляецца аб перабоях з цяплом і вадой.
Аб працы сістэм СПА паведамляюць улады Кіеўскай, Чарнігаўскай, Адэскай і Львоўскай абласцей. Кіраўнік Хмяльніцкай абласной ваеннай адміністрацыі Сяргей Гамалій заклікае грамадзян спусціцца ва ўкрыцці.
Аб праблемах з энергазабеспячэннем паведамляе і кіраўнік Цярнопаля Сяргей Надал.
Як паведамляе аператыўнае камандаванне "Поўдзень" УСУ, расіяне працягваюць абстрэльваць Украіну з дапамогай дронаў-камікадзэ. Мінулай ноччу падчас масавага ўдару па паўднёвых рэгіёнах украінскія СПА збілі 10 ударных беспілотнікаў.
Кіраўнік офіса прэзідэнта Андрэй Ярмак напісаў, што Украіна зноў падверглася ракетным абстрэлам "ад тэрарыстаў, якія ваююць з грамадзянскай іфраструктурай і людзьмі". Гэта, на думку Ярмака, робіць украінцаў больш злоснымі.
"А гэта азначае, што наш адказ будзе яшчэ мацнейшым", — сказаў дарадца Зяленскага.
