Расія часова забараніла імпарт малдаўскага віна
Прэтэнзіі да яго якасці ўзніклі ў Расспажыўнагляду.
Кіраўнік ведамства Генадзь Анішчанка заявіў, што забарона будзе дзейнічаць датуль, пакуль Масква не ўбачыць з боку Кішынёва канкрэтных крокаў па рашэнні праблемы, перадае РБК.
На пачатку верасня прадстаўнікі Расіі абвясцілі, што каля 30 тысяч літраў малдаўскай алкагольнай прадукцыі не адпавядаюць патрабаванням бяспекі. У спіртным выявілі пластыфікатары.
Улады Малдовы не разумеюць, чаму забаранілі ўвоз іх віна. Міністр эканомікі Валерый Лазэр заклікаў падначаленых аб'ектыўна ацаніць сітуацыю і разабрацца, што адбываецца насамрэч. "Для мяне вельмі важна высветліць, дзе сканчаюцца тэхнічныя аспекты і пачынаюцца палітычныя", — заявіў ён.
Раней у расійскага ведамства з'явіліся прэтэнзіі да харчовай прадукцыі з Украіны і Беларусі. СМІ абвясцілі пра пачатак трох прадуктовых войнаў.
Фота — lenta-ua.net
