Алімпійскія гульні ў Лондане адкрыліся яскравым шоу

Зборная Беларусі на адкрыцці Алімпійскіх гульняў (відэа)

Алімпійскі агонь запалілі сем юных атлетаў пры дапамозе 205 бронзавых пялёсткаў, якія сімвалізавалі кожную з каманд-удзельніц Гульняў. Гэтыя бронзавыя пялёсткі ўтварылі агромісты бронзавы кубак, які будзе гарэць да 12 жніўня — дня закрыцця Алімпійскіх гульняў. Агулам цырымонія адкрыцця доўжылася 3 гадзіны 48 хвілінаў, перадае ВВС.

Лондан з’яўляецца своеасаблівым рэкардсменам — гэты горад прымае Алімпіяду ў трэці раз за 104 гады. Пры гэтым арганізатарам сёлетніх Гульняў давялося прайсці няпросты шлях за 7 гадоў падрыхтоўкі. Упершыню ў гісторыі Алімпіяды ва ўсіх дэлегацыях ёсць спартсменкі, што пацвярджае роўнасць палоў.

А 0.18 паводле мясцовага часу (2.18 паводле Мінска) каралева Элізабэт ІІ абвясціла Гульні-2012 адкрытымі, пасля чаго над стадыёнам быў узняты алімпійскі сцяг. Сярод тых, хто выносіў гэты белы сцяг з алімпійскімі кольцамі, былі генеральны сакратар ААН Пан Гі Мун, змагар за правы чалавека Шамі Чакрабарці, а таксама ізраільскі дырыжор Даніэль Барэнбойм.

Таксама выйшаў на арэну і дакрануўся да сцяга знакаміты баксёр Махамед Алі, які пакутуе на хваробу Паркінсона.

За адкрыццём Алімпіяды з трыбунаў назіралі 80 тысяч чалавек. Меркаваная аўдыторыя цырымоніі адкрыцця на розных мультымедыйных платформах склала 4 мільярды чалавек.