Еўракамісія: беспрацоўе моладзі ў ЕС можа прывесці да катастрофы
У студзені сёлета ўзровень беспрацоўя ў Еўрасаюзе дасягнуў рэкорднага паказчыка ў амаль 12% ад актыўнага насельніцтва.
Гэта амаль 19 мільёнаў беспрацоўных у 17 краінах зоны еўра. 5 млн 700 тысяч з іх — моладзь да 25 гадоў, паведамляе еўрапейская статыстычная служба.
"Узровень беспрацоўя недапушчальна высокі", — сказаў пра гэтыя лічбы афіцыйны прадстаўнік Еўракамісіі Джонатан Тод. Ён падкрэсліў, што ў дапамозе найперш мае патрэбу моладзь, каб атрымаць добрую прафесійную кваліфікацыю і павысіць свае шанцы знайсці працу.
"Беспрацоўе моладзі можа мець катастрафічныя наступствы, калі яно зацягнецца надоўга, таму што азначае, што маладыя людзі знаходзяцца не толькі па-за рынкам працы, але часта і па-за грамадствам увогуле", — цытуе словы Джонатана Тода "Интерфакс-Запад".
Фота — Fotoliaarsdigital
