Гамяльчане выткалі ручнік на магілу Анатоля Сыса
Цяпер ручнік завязуць у вёску Гарошкаў Рэчыцкага раёну, дзе 27 кастрычніка будзе праходзіць свята паэзіі “Дух — гэта, людзі, Я!”.
Як распавялі Еўрарадыё самі арганізатары гэтай акцыі, мерапрыемства такога кшталту ладзілася ўпершыню. Штуршком да яго паслужыла тое, што сам вобраз ручніка вельмі часта апяваецца ў вершах знакамітага беларускага паэта, аднак усе ручнікі, якія знаходзяцца на могілках у Гарошкаве, нагадваюць хутчэй проста стылізаваную тканіну.
А хацелася, каб на магіле Анатоля Сыса з’явіўся сапраўдны беларускі ручнік, прычым, што адметна, вытканы звычайнымі гамяльчанамі, а не набыты ў якой-небудзь краме. Таму і было вырашана зрабіць паэту вось такі падарунак.
