Год да Алімпіяды ў Лондане: весляры чакаюць лодкі з 2009 года
А плыўчыхі не могуць нармальна стартануць, бо не хапае тумбачак за 600 еўра
8 жніўня Аляксандр Лукашэнка наведвае вяслярны канал у Заслаўі, дзе Кацярына Карстэн скардзіцца пра адсутнасць лодак. Па словах старшыні Беларускай федэрацыі веславання Аляксандра Грыгарава, заяўку на набыццё лодак склалі яшчэ ў… 2009 годзе. З таго часу весляры чакаюць 21 лодку.
“Вось зараз пералічваем грошы, каб набыць камбінезоны. Ёсць жа інструкцыя набываць беларускае. Але спартоўцы мусяць выступаць у камбінезонах, якія адпавядаюць міжнароднаму ўзроўню. Набываем зараз вёслы. Харчовыя дабаўкі таксама набывае федэрацыя, але асноўныя пакупкі павінна рабіць міністэрства.”
Якасная адзіночная лодка ў сярэднім каштуе 10 тысяч еўра, а 2-хмясцовая – 12-14 тысяч еўра. Абнаўляцца лодкі павінны штогод. І пакуль весляры скардзяцца на адсутнасць лодак, фінансаванне іх віду спорту… памяншаюць.
Грыгараў: “У параўнанні з мінулым годам фінансаванне паменшылася на 110 тысяч еўра”.
Еўрарадыё падлічыла, што за гэтыя 110 тысяч еўра можна было набыць 11 “адзіночак” ці 7-9 двухмясцовых лодак.
А чэмпіёнка свету у плаванні Аляксандра Герасіменя трэніруецца ў басейнах, дзе немагчыма зрабіць добры старт, бо… няма тумбачкі.
“Ужо некалькі гадоў выкарыстоўваюцца новыя стартавыя тумбачкі. Такія нядаўна паставіў толькі адзін басейн – у Брэсце. Паўсюль стаяць звычайныя, на якіх патрэніравацца ці зрабіць старт немагчыма. А ўсе афіцыйныя старты праводзяцца толькі на такіх тумбачках.”
Як даведалася Еўрарадыё, адна тумбачка каштуе каля 600 еўра. Спартоўцы кажуць, што ім дастаткова 1 ці 2 такіх тумбачкі. Пакуль жа даводзіцца адаптавацца да нязвыклых стартаў непасрэдна на месцы спаборніцтваў.
“Ніхто не цікавіцца сучаснымі тэхналогіямі ў спорце. Усе зацыкліліся: “Ёсць басейн – ідзіце плавайце!” А на такія важныя нюансы ніхто не звяртае ўвагі.”
Плыўцам паабяцалі неўзабаве тумбачкі набыць. Але іх трэба спачатку знайсці, пасля заказаць, аплаціць і даставіць. Ці паспеюць да алімпіяды?
