Кагоўт: У Беларусі яшчэ ёсць час, каб вырашыць свой далейшы лёс

Еўрарадыё: Восенню Савет міністраў Еўрасаюза будзе разглядаць вельмі важнае для Беларусі пытанне, пытанне аб магчымым скасаванні санкцый супраць беларускіх чыноўнікаў.

Мы ўсе ведаем, што тэмпы дэмакратызацыі, якія сёння адбываюцца ў Беларусі, пакідаюць жадаць лепшага. Мы бачым, што цяпер адбываюцца падзеі, якія замінаюць дэмакратызацыі краіны. Напрыклад, у галіне свабоды слова, правоў чалавека. І нас усіх непакоіць тэндэнцыя, калі з набліжэннем прэзідэнцкіх выбараў тэндэнцыя да пагаршэння з правамі чалавека можа ўзмацняцца.

Скажыце, калі ласка, якой будзе пазіцыя Чэхіі пры разглядзе пытання аб скасаванні санкцый у выпадку пагаршэння сітуацыі з правамі чалавека ў Беларусі?

Ян Кагоўт: “Мы, Чэшская Рэспубліка і чэшская дыпламатыя, надзвычай пільна сочым за сітуацыяй у сферы шанавання правоў чалавека і за крокамі па дэмакратызацыі ў Беларусі. Нас непакояць некаторыя новыя моманты ці выпады супраць незалежных СМІ і няўрадавых арганізацый.

Санкцыі, якія дзейнічаюць з боку Еўрапейскага Саюза, будуць разглядацца ўвосень, і мне здаецца, што яшчэ дастаткова шмат часу для таго, каб з Мінска прыйшоў ясны адказ на пытанне, як там уяўляюць лёс сваёй краіны. Будучыня санкцый не толькі ў нашых руках, яна перш за ўсё ў руках адміністрацыйнага апарату і ўраду ў Мінску.

Быць ім ці не быць, вырашыць не Чэшская Рэспубліка, а тое, якім чынам будзе сябе паводзіць і камунікаваць Мінск. З нашага боку гэта зусім не шантаж, а толькі прасоўванне тых дэмакратычных прынцыпаў, стандартаў і каштоўнасцяў, да якіх мы прывыклі і якія лічым дзейнымі і ўніверсальнымі не толькі для Ўсходняй Еўропы ці для нашай краіны, але і для Беларусі.

Інакш кажучы, у выпадку, калі не будзе дасягнута крокаў і прагрэсу ў сферы аховы правоў чалавека або крокаў па дэмакратызацыі, пра якія мы ўжо столькі разоў гаварылі, у такім выпадку я з цяжкасцю магу сабе ўявіць нейкую вялікую пазітыўную змену пазіцыі Чэшскай Рэспублікі.

Але я ўсё яшчэ веру, што час, які ёсць у распараджэнні, будзе хутчэй матываваць да пазітыўных крокаў з боку Мінску, якія пераканаюць нас у тым, што сітуацыя сапраўды значна і сістэмна змяняецца”.



Фота: aktualne.centrum.cz