Мінсувязі хоча прадаць "Прамсувязь" кітайцам
Беларускія ўлады маюць намер паскорыць за кошт пераносу з 2012 на 2011 год прыватызацыю ААТ "Прамсувязь".
Як заявіў сёння міністр сувязі Мікалай Панцялей, гаворка ідзе аб продажы замежнаму інвестару "100% імпартаёмістага" прадпрыемства, якое напярэдадні прэзентавала тры мадэлі "айчыннага” мабільніка, зробленага з кітайскіх камплектуючых.
"Прынята пастанова Саўміна, дзе прыватызацыя " Прамсувязі" запланавана на 2012 год. Але мы пастараемся ўсё ж паскорыць гэтую працэдуру, бо зацікаўлены ў хутчэйшым прыходзе інвестара", — сказаў Панцялей.
Па словах міністра, галоўнай умовай продажу стане "глыбокая лакалізацыя вытворчасцей складанага тэлекамунікацыйнага абсталявання".
Адзін з верагодных партнёраў — кітайская Huawei — не хавае свайго жадання набыць пакет акцый ААТ "Прамсувязь", паведамляе БелТА са спасылкай на прадстаўніка Huawei. Менавіта гэтая кампанія вырабляе для Прамсувязі ADSL-мадэмы, якія ўкараняюцца ў масы з дапамогай дзяржманаполіі Белтэлекам, піша АФН.
