Міліцыя выступіла з уласнай версіяй падзей у Ваўкавыскай бальніцы
Паводле версіі праваахоўнікаў, лекар падчас медагляду п’янага кіроўцы парваў форму на супрацоўніку ДПС.
Заява гродзенскіх міліцыянераў з’явілася на афіцыйным сайце мясцовага ГУУС. Паводле іх версіі, доктар зацянуў медагляд дастаўленага даішнікамі ў бальніцу кіроўцы больш чым на паўгадзіны. А потым паспрабаваў правесці аналіз крыві ў пакоі, недасяжным да міліцыянтаў. Калі яны гэтаму запярэчылі, то доктар прымяніў фізічную сілу і парваў форму аднаго з інспектараў.
Нагадаем, што інцыдэнт у Ваўкавыскай бальніцы адбыўся ў ноч на 16 ліпеня. Паводле версіі самога доктара, міліцыянеры падчас медагляду перашкаджалі працы медыкаў, мацюкаліся і здымалі працэс на мабільны тэлефон. Калі доктар паспрабаваў вывесці кіроўцу ў іншы пакой, даішнікі адзелі яму на рукі кайданкі і пачалі збіваць. Сведкамі збіцця доктара міліцыянтамі сталі яго калегі.
