На "Папяровай фабрыцы Дзяржзнака" знайшлі прыпіскі маладняку
Следчы камітэт пачаў крымінальную справу супраць намесніка гендырэктара фабрыкі.
Як піша "Ежедневник", крымінальная справа стала вынікам дзейнасці Камітэта дзяржаўнага кантролю. Напрыканцы 2012 года ён у рамках суправаджэння "Дажынак" правяраў на вашывасць прэтэндэнтаў на званне лепшых аграрнікаў краіны.
Тады са спісаў магчымых пераможцаў па Міншчыне былі выключаныя шэсць прэтэндэнтаў, у якіх выявіліся прыпіскі. Сярод іх быў філіял фабрыкі Дзяржзнака "Ніўкі", якім і кіруе намеснік гендырэктара па сельскай гаспадарцы.
Паводле папярэдніх звестак Следчага камітэта, намеснік дырэктара ўнёс у дзяржаўную статыстычную справаздачнасць заведама ілжывыя звесткі аб прыбаўленні ў вазе і прыросце маладняка ў "Ніўках". Цяпер наменсіку дырэктара пагражае да трох гадоў пазбаўлення волі з пазбаўленнем права займаць адпаведныя пасады.
Праўда, расследаванне толькі пачалося. Цяпер ідзе праверка фінансава-гаспадарчай дзейнасці прадпрыемства.
Фота — goznakpaper.by
