Над Беларуссю гэтай ноччу было палярнае ззянне
Надзвычай рэдкую для нашых шыротаў з’яву спарадзіла нядаўняя магутная ўспышка на Сонцы.
Яна прывяла да ўзнікнення магутнага патоку зараджаных часцінак, якія праз некаторы час даляцелі да Зямлі і сутыкнуліся з верхнімі слаямі атмасферы планеты — іонасферай. Пры гэтым атамы нашай атмасферы разбураліся на іоны і аб’ядноўваліся ізноў (гэты працэс называецца рэкамбінацыяй), выпраменьваючы святло розных колераў.
Здараюцца такія абставіны раз у некалькі год, таму ўбачыць начныя сполахі на паўночным схіле неба — сапраўды рэдкая ўдача.
На жаль, ззянне, якое можна было ўбачыць сёння, было не вельмі яркім, таму ў горадзе з ліхтарамі і смогам былі бачныя толькі асобныя яго элементы. Затое жыхары сельскай мясцовасці і пасажыры аўтамабіляў, што падарожнічалі ўначы, маглі атрымаць асалоду ад каляровай завесы, што павольна гайдалася на поўначы, піша “Наша Ніва”.
