Польскія СМІ: Бяляцкі прасіў не выдаваць яго рахункі афіцыйнаму Мінску

Паводле інфармацыі выдання, кіраўнік праваабарончага цэнтру “Вясна” у чэрвені 2011 года наведаў амбасаду Польшчы. Ён прасіў у аднаго з дыпламатаў, каб польскі бок не перадаваў беларускім уладам інфармацыю пра яго замежныя рахункі, на якія прыходзілі грошы на праваабарончую дзейнасць.

“Бяляцкі паведаміў, што ягоны адвакат бачыў у матэрыялах справы копію звароту аб юрыдычнай дапамозе, накіраванага ў Польшчу. Бяляцкага запэўнілі што аб гэтым будзе пільна паінфармаваны міністр замежных справаў Польшчы Радаслаў Сікорскі”, — піша газета.

Польскі МЗС, аднак, тлумачыць, што спадар Сікорскі ніколі не атрымліваў такой інфармацыі.

“Міністр Радаслаў Сікорскі не атрымаў якой-кольвечы, тайнай ці яўнай, са зместам, пра які вы гаворыце”, — заявіў Rzeczpospolita прэсавы прадстаўнік МЗС Марцін Басацкі.

Газета адзначае, што пры гэтым спадар Басацкі адмовіўся пацвердзіць, ці Бяляцкі размаўляў з польскімі дыпламатамі ў Мінску у гэтай справе.

Між тым факт, што Алесь Бяляцкі ў чэрвені 2011 году асабіста наведаў амбасаду Польшчы і прасіў не перадаваць інфармацыю пра рахункі беларускаму боку, пацвердзіў для газеты Rzeczpospolita ягоны калега Валянцін Стэфановіч, а таксама жонка — Наталля Пінчук.

Паводле спадара Стэфановіча, польскі дыпламат запэўніў, што такая перадача дадзеных у прынцыпе немагчымая.

Кіраўнік праваабарончага цэнтру “Вясна” Алесь Бяляцкі асуджаны на 4,5 года турмы ў лістападзе летась. Яго прызналі вінаватым у нявыплаце падаткаў. Праваабаронца сваёй віны не прызнаў і заявіў, што ўсе грошы, атрыманыя на ягоныя рахункі, ішлі на праваабарончую дзейнасць.

Падставай для крымінальнага пераследу Бяляцкага стала інфармацыя пра банкаўскія рахункі, якую перадалі афіцыйнаму Мінску Літва і Польшча.