Прафесара Івана Кулікова будуць судзіць 11 траўня
Следства мяркуе, што экс-прэтэндэнт у прэзідэнты цягам 8 гадоў налічваў заробак "мёртвым душам" у Інстытуце энэргетычных і ядзерных даследаванняў "Сосны".
Суд над былым прэтэндэнтам на пасаду прэзідэнта прафесарам Іванам Куліковым пачнецца 11 траўня. Пра гэта Еўрарадыё паведаміў яго сын Уладзімір.
Нагадаем, што Іван Кулікоў балатаваўся ў прэзідэнты на мінулых выбарах, але зняў сваю кандыдатуру на этапе збору подпісаў. Праз месяц пасля выбараў навукоўцу выставілі абвінавачванне ў крадзяжы шляхам злоўжывання службовымі паўнамоцтвамі, здзейсненага ў буйным памеры.
У сакавіку стала вядома, што Кулікову перакваліфікавалі абвінавачванне на "нанясенне шкоды ў значным памеры шляхам атрымання выгады ў выніку падману, злоўжывання даверам або шляхам мадыфікацыі камп'ютарнай інфармацыі пры адсутнасці прыкметаў крадзяжу". Згодна з новымі звесткамі следства, навукоўца цягам 8 гадоў налічваў заробак "мёртвым душам", але гаворка ўжо ідзе не пра 22, а пра 8,6 млн рублёў. І цяпер следства не думае, што ў мінулым патэнцыйны кандыдат на прэзідэнта іх выкраў.
