У Баранавічах назіральніка аштрафавалі за... брыдкаслоўе
Суд прызнаў назіральніка Сяргея Гоўшу вінаватым у абразе сяброў акруговай выбарчай камісіі. Яму прысудзілі штраф — 1,5 млн рублёў.
Як паведамляе сайт intex-press.by, у заяве старшыні камісіі Таццяны Латышавай паведамлялася, што назіральнік Сяргей Гоўша абразіў яе і сяброў камісіі "словамі грубай нецэнзурнай лаянкі".
Назіральнік прадаставіў у суд дыктафонны запіс спрэчнага моманту. Яго праслухалі двойчы, і нават сведкі прызналіся, што не пачулі на ім пацверджання сваім абвінавачванням. Аднак суддзя не прызнаў запіс размовы бакоў за першакрыніцу.
Сяргей Гоўша ўжо напісаў заяву ў Цэнтральную выбарчую камісію.
Фота — nn.by
