У Маскве паліцыя разагнала новы лагер апазіцыі (фота)

Акцыя праводзілася ўначы. На той момант на плошчы амаль не было журналістаў. У лагеры заставалася каля 250 чалавек.

Як інфармуе gazeta.ru, праз некалькі гадзінаў усе затрыманыя былі вызваленыя з пастарункаў без складання пратаколаў.

А 4-й раніцы каля 50 чалавек сабраліся на Цвярскім бульвары. Каля іх дзяжурылі пяць аўтобусаў з паліцыянтамі. Іншыя дэманстранты вярнуліся на Кудрынскую плошчу альбо пайшлі на Стары Арбат (былі апазіцыянеры і каля будынка гарсуда). Такім чынам, у расійскай сталіцы дзейнічалі чатыры мабільных лагеры апазіцыі. Але да 8-й раніцы паліцыя правяла і іх "зачыстку" (на Кудрынскай плошчы затрымалі яшчэ 14 чалавек, паведамляе "Эхо Москвы") ды перашкаджае вяртанню на месцы лагераў людзей.

Нагадаем, расійская апазіцыя пратэстуе ў форме "народных гулянняў" супраць дзейнай улады ад дня інаўгурацыі Уладзіміра Пуціна. Яна патрабуе вызвалення палітзняволеных і правядзення новых выбараў. Як мяркуецца, акцыі будуць працягвацца да 12 чэрвеня, калі ў Маскве мусіць прайсці чарговы масавы апазіцыйны марш.

Фота — Еўрарадыё