У Маскве праходзіць акцыя “Вялікае белае кола”
Прыхільнікі справядлівых выбараў хочуць, узяўшыся за рукі, замкнуць Садовае кальцо. Для гэтага трэба каля 34 тысяч актывістаў.
Пакуль невядома, ці замкнёнае кальцо цалкам, паведамляе Lenta.ru. На некаторых, апублікаваных у Твітары, здымках бачна, што людзі стаяць шчыльным ланцугом. На іншых бачна, што ланцуг удаецца замкнуць толькі пры дапамозе белай стужкі. Арганізатары акцыі сцвярджаюць, што Садовае кальцо ўсё ж замкнулі, аднак маскоўская паліцыя налічыла толькі 11 тысяч чалавек.
Між тым на Зубаўскім бульвары выстраіліся актывісты, у якіх на шыі вісяць ружовыя сардэчкі з надпісам “Пуцін любіць усіх”. Акрамя таго, з вокнаў дамоў некаторыя вывесілі сцягі ў падтрымку прэм’ера Уладзіміра Пуціна, які будзе ўдзельнічаць у выбарах прэзідэнта Расіі.
