У Пінску ва ўчастковыя выбарчыя камісіі ўвайшлі два дэмакраты
Агулам у Пінскай гарадской выбарчай акрузе №14 утворана 87 выбарчых участкаў.
Па словах кіраўніка пінскай арганізацыі ПБНФ Аляксандра Рамановіча, яго партыя вылучала ў склад выбаркамаў чатырох чалавек. Аднак выканкам зацвердзіў толькі Людмілу Алёхіну.
А вось партыя левых “Справядлівы свет” мае 100-адсоткавы вынік. Левыя вылучылі толькі Аляксея Бурдэйнага, які і стаў чальцом камісіі.
Іх калегамі па камісіях стануць пінчукі, вылучаныя ад праўладных грамадскіх аб’яднанняў, і тыя, хто вылучаўся зборам подпісаў ад грамадзян. Праўда, яшчэ адна палітычная сіла паказала сваю моц у Пінску: каля дзясятка сяброў праўладнай Камуністычнай партыі Беларусі таксама сталі чальцамі выбаркамаў.
Фота — moe-online.ru
