У Польшчы арыштаваны беларускі кіроўца, які ўчыніў аварыю
Акруговы суд у Ольштыне на просьбу паліцыі арыштаваў 32-гадовага грамадзяніна Беларусі. У зняволенні ён правядзе мінімум 3 месяцы.
Мужчыну могуць прызнаць вінаватым у няшчасным выпадку, які пацягнуў за сабой смерць.
Як паведамляла Еўрарадыё, трагічны выпадак здарыўся 6 верасня ў Варміньска-Мазурскім ваяводстве. BMW, якім кіраваў беларус, спрабаваў абагнаць іншы аўтамабіль у месцы, дзе гэта забаронена. Акрамя таго, мужчына перавысіў дазволеную хуткасць, абганяў аўтамабіль пры кепскай бачнасці.
У выніку BMW беларуса выехаў на сустрэчную паласу і сутыкнуўся з аўтамабілем Suzuki Swift. Ад сутыкнення аўтамабіляў загінуў 84-гадовы польскі кіроўца. Двое беларусаў, якія знаходзіліся ў BMW, сур’ёзна не пацярпелі.
Польскія СМІ паведамляюць, што беларусу пагражае да 8 гадоў зняволення.
Фота — naszemiasto.pl
