У турфірмах долар каштуе столькі ж, колькі еўра ў авіякампаніі

У інтэрнэт-краме лічбавай тэхнікі zaza.by зранку ў пятніцу долар каштаваў 6700 рублёў. А пасля абеду падаражэў да 6900 рублёў і пакуль больш не мяняўся. Па словах супрацоўніка крамы, курс пачаў скакаць на апошнім тыдні, да таго ж назіралася адносная стабільнасць. Праўда, пакупнікі стараліся набываць дробныя тавары.

“Попыт, зразумела, упаў, але нешта бяруць. Пераважна бяруць невялікія тавары: акумулятары, флэшкі – да 50 долараў. Нешта буйное – за 200 ці 300 долараў – бяруць мала. Адносна нядрэнна бяруць фотаапараты.“

У інтэрнэт-краме deshevo.by апошнім часам сітуацыя з заказамі таксама нармалізавалася. Але за апошні тыдзень кошт долара вырас з 6300-6400 да 7200 рублёў, а пакупнікі паменшылі сваю актыўнасць.

“Тэлефануюць, пытаюцца, але неяк неахвотна. Бачаць, што нядаўна ўсё было больш-менш стабільна, а цяпер зноў пачало расці. У мінулым месяцы было добра з заказамі, набывалі. А зараз невядома, што будзе ў бліжэйшай будучыні.”

Апошні месяц курс долара ў турфірмах складае 7400-7500 рублёў. Па словах супрацоўніцы фірмы “Сальвейк-тур”, у параўнанні з прошлым годам, ездзіць адпачываць сталі меней. Калі і едуць, выбіраюць бюджэтныя пуцёўкі ў Балгарыю ці Турцыю.

Супрацоўніца “Сальвейк”: “У мінулым годзе летам нам не было калі папіць кавы. Толькі цяпер людзі ажывіліся, і актыўнасць стала нагадваць пачатак жніўня мінулага года.”

Супрацоўніца “Сальвейк” кажа, што да самога курса турысты прывыклі і ўжо не так не здзіўляюцца, як некалькі месяцаў таму.

У нацыянальнай авіякампаніі “Белавія” курс еўра складае 7212 рублёў. Гэта крыху больш кошту еўра паводле Нацбанка (7071 рубль) і меней кошту долара ў турфірмах (7400-7500 рублёў). За долар у “Турэцкіх авіялініях” прыйдзецца заплаціць таксама больш, чым за еўра ў “Белавія” – 7370 рублёў.

Карэспандэнт Еўрарадыё замовіў на сайце aw.by раменны шкіў для Opel 2002 года. Кошт запчасткі - 162 еўра. Можна плаціць і рублямі па курсе 9150 рублёў за еўра.

Фота: krapka.eu