У Беларусі затрымалі кіраўніка Віленскай коннай паліцыі (фота+відэа)

Мытнікі і супрацоўнікі КДБ знайшлі ў яго амфетамін. Сам афіцэр сцвярджае, што наркотыкі яму падкінулі. Палітаглядальнік Раман Якаўлеўскі мяркуе, што падзея ўскладніць падпісанне дамовы пра ільготны памежны рух паміж нашымі краінамі (АБНОЎЛЕНА). Каля мяжы Беларусі і Літвы затрымалі ротнага камандзіра муніцыпальнай коннай паліцыі пры Віленскім галоўным камісарыяце Лайманаса Банкаўскаса. Афіцэра, які быў не на службе, а ў адпачынку, вінавацяць у перавозцы амфетаміну.

У аперацыі ўдзельнічалі не толькі мытнікі, але і супрацоўнікі КДБ. Затрымалі Банкаўскаса на пасту Ашмяны, і ў цяперашні час перавезлі ў СІЗА ў Гродне.

Сам віленскі паліцыянт сцвярджае, што наркотыкі яму падкінулі.

Літоўскія службовыя асобы не вераць у вінаватасць Банкаўскаса

Андрэй Елісееў

У інтэрв'ю журналістам тэлеканала "Летувас Рытас" (Lietuvos rytas) літоўскі амбасадар у Беларусі Эдмінас Багдонас заявіў, што кантактаваў са сваякамі затрыманага афіцэра:

Багдонас: "Яго вінавацяць у парушэнні шэрагаў артыкулаў Крымінальнага кодэкса, у тым ліку 228-м за кантрабанду наркотыкаў... Мы будзем аказваць усебаковую консульскую дапамогу, тое, што ў нашай кампетэнцыі. Мы кантактавалі з яго блізкімі. Тут таксама ёсць такія-сякія нюансы. Яго сваякі, з якімі мы размаўлялі, адмаўляюць, што гэта праўда. Кажуць, што калі і былі [знойдзеныя наркотыкі], дык іх падкінулі".

Старшыня паліцыі Віленскай акругі Кястуціс Ланчынскас пра здарэнне даведаўся ад літоўскіх журналістаў. Ён таксама адмаўляецца верыць, што Банкаўскас перавозіў наркотыкі: "Ён вельмі добры паліцэйскі супрацоўнік. Не веру, што ён мог перавозіць наркотыкі".


Якаўлеўскі: Затрыманню літоўскага паліцыянта папярэднічаў шэраг скандалаў

Зміцер Лукашук

Затрыманне афіцэра коннай паліцыі Лайманаса Банкаўскаса можа прывесці да ўскладнення адносінаў паміж Беларуссю і Літвой. Да такой высновы ў размове з Еўрарадыё прыйшоў эксперт у беларуска-літоўскіх узаемаадносінах Раман Якаўлеўскі. І звярнуў увагу на шэраг падзей апошняга часу.

Якаўлеўскі: “Я нагадаю, што да сённяшняй навіны з’явілася інфармацыя пра затрыманне ў Літве літоўскага грамадзяніна, які вёз у Беларусь 100 кілаграмаў гашыша. Нейкім чынам сённяшняя навіна супала дзень у дзень з падпісаннем паміж двума бакамі дамоўленасці аб транзіце нафты. І яшчэ адна нядаўняя падзея – як беларускім памежнікам спрабавалі літоўскія бізнэсмены хабар даць. Пра гэта вельмі гучна давалі інфармацыі беларускія медыі”.

Але асаблівую ўвагу эксперт звярнуў на праблему з падпісаннем дамовы пра ільготны памежны рух паміж нашымі краінамі. На думку Якаўлеўскага, скандал з затрыманнем літоўскага паліцыянта можа ўзмацніць аргументацыю беларускага боку, якая б тлумачыла затрымкі з падпісаннем гэтага дакумента.