У гродзенскай бальніцы ўчора паспяхова змагаліся з "птушыным грыпам"

Спецыяльныя вучэнні прайшлі ўчора ў адной з бальніц Гродна. Адпрацоўваліся дзеянні медперсаналу на выпадак паступлення трывожнага сігналу. Паводле легенды вучэнняў, у бальніцу звярнулася мясцовая жыхарка з падазронымі сімптомамі захворвання. Стан яе ўвесь час пагаршаўся, тэмпература павышалася, дзяўчына адчувала агульную слабасць.

Прыёмны пакой адразу быў закрыты для наведвальнікаў, пацыентку ізалявалі ў закрытым боксе. На працягу некалькіх хвілін аналізы яе крыві былі накіраваныя ў спецлабараторыю.

Такія вучэнні праводзяцца з-за выяўлення небяспечнага вірусу птушынага грыпу ў некалькіх раёнах Польшчы. На беларускіх мытных пунктах пропуску ўжо ўзмоцнены санітарны кантроль, паведамляе тэлеканал СТВ.