У Маскве вырашаюць, ці прызнаваць незалежнасць Асеціі і Абхазіі

Савет Федэрацыі і Дзярждума Расіі адзінагалосна заклікала прэзідэнта Расіі прызнаць незалежнасць Паўднёвай Асеціі і Абхазіі. У Маскве знаходзяцца кіраўнікі самаабвешчаных рэспублік.
Як адзначае "Наша ніва", гэтае рашэнне не мае юрыдычнай сілы. Прызнаць незалежнасць можа толькі Міністэрства замежных спраў на даручэнне прэзідэнта. Цяпер чакаецца рашэнне Мядзведзева і Пуціна.

Выпадак Асеціі і Абхазіі розніцца ад іншых прэцэдэнтаў апошняга часу тым, што Расія дзейнічае аднаасобна. Маскву на сёння афіцыйна падтрымалі толькі тры краіны ва ўсім свеце - Беларусь, Венесуэла і Сірыя.

Прэзідэнт Францыі Нікаля Сарказі склікае 1 верасня саміт ЕС, каб абмеркаваць сітуацыю ў Грузіі. Сустрэча адбудзецца ў Брусэлі.