Аляксей Шэін: Гэта рэдкі выпадак, калі ўлады прыслухаліся да голасу людзей

Аляксей Шэін, адзін з лідэраў беларускага хрысціянска-дэмакратычнага руху, пракаментаваў Еўрарадыё забарону ў Беларусі рэкламы паслугаў экстрасенсаў і варажбітоў. Як вядома, менавіта хрысціянскія дэмакраты збіралі подпісы супраць падобнай рэкламы і перадавалі іх у мясцовыя і цэнтральныя органы ўлады. І вось вынік - Палата прадстаўнікоў прыняла адпаведныя папраўкі ў заканадаўства.

Вось што кажа Аляксей Шэін:

"Гэта адзін з тых рэдкіх выпадкаў, калі сённяшнія беларускія ўлады прыслухаліся і да голасу людзей з розных гарадоў і рэгіёнаў Беларусі, якія гэтае пытанне актыўна падымалі. І, нарэшце, да голасу здаровага сэнсу".

Шэін лічыць, што мы сталі сведкамі "следавання нармальнай, здаровай палітыкі, стандарты якой існуюць у цывілізаваным свеце". Ён нагадвае, што зусім нядаўна падобную забарону прыняў парламент Англіі.