Аналіз малака на антыбіётык каштуе ад 40 да 70 тысяч рублёў

Праверыць малако на наяўнасць антыбіётыкаў можа кожны жадаючы. Для гэтага трэба звярнуцца ў мясцовую санэпідэмслужбу. Праўда, прыватныя асобы рабіць гэта пакуль не спяшаюцца, паведамілі Еўрарадыё ў Санітарна-эпідэміялагічнай службе Мінска:
Супрацоўніца Санэпідслужбы Мінска: “Ад прыватнікаў зваротаў няма, звычайна ў нас ідуць гарадскія малаказаводы, такія вялікія прадпрыемствы”.

Сама паслуга платная. У залежнасці ад таго, які антыбіётык будуць шукаць у малацэ, цана аналізу вагаецца ад 40 да 70 тысяч рублёў. Працэдура займае ў мікрабіёлагаў каля тыдня, а потым яны робяць выснову, ці прыгодны да спажывання гэты прадукт.

Калі ж выпіць малако з антыбіётыкам, ёсць пагроза атруціцца. А ў асобаў з алергіяй на той ці іншы лек, яна можа абвастрыцца.