Андрэй Арамнаў, хутчэй за ўсё, зможа паехаць на Алімпіяду

Беларускі штангіст Андрэй Арамнаў пакуль не дыскваліфікаваны, але рашэнне па ім будзе прынята неўзабаве. Пра гэта Еўрарадыё распавёў дзяржаўны трэнер па цяжкай атлетыцы Міхаіл Захаранка.

"Я размаўляў з намеснікам старшыні федэрацыі. Ён сказаў, што прайшло гэтае слуханне, і рашэнне пра дыскваліфікацыю Арамнава да 6 снежня, пра якое пісалі, не афіцыйнае. Гэта яны толькі прапануюць Міжнароднай федэрацыі прыняць такое рашэнне. Яны перадаюць гэтыя паперы і сваё рашэнне ў кіраўніцтва Міжнароднай федэрацыі, якое потым на прызідыюме будзе вырашаць, што з намі рабіць".

Міхаіл Захаранка адзначыў, што дыскваліфікацыя найхутчэй будзе на паўгода, але з-за яе Андрэй Арамнаў не прапусціць ніводнага сур'ёзнага спаборніцтва. Што тычыцца чэмпіянату свету ў Турцыі, то беларускі асілак прапусціў яго, бо не меў права выступаць, пакуль ідзе разгляд яго справы. Але, кажа Міхаіл Захаранка, допінг – прычына не першапачатковая.

"Яму адпачыць трэба было і залячыць траўмы. Рашэнне аб яго няўдзеле ў гэтым чэмпіянаце было прынятае ў траўні, а ў ліпені кандыдатаў ужо адбіралі. Па-мойму, тады яшчэ не было дакладнага рашэння, ці трэба яму выступаць. А вынік таго, што ён недзе там патрапіўся, прыйшоў толькі ў канцы чэрвеня. Многія СМІ пісалі, што ён не удзельнічаў з-за праблемаў, але ў мяне іншае меркаванне. Гэта ў выніку ўжо атрымалася, што ён і не меў права выступаць".

Пакуль невядомы і лёс залатога медаля чэмпіянату Еўропы, які Андрэй заваяваў у красавіку ў Мінску. Цалкам верагодна, што яго забяруць у спартсмена, але гэта ўжо будзе вырашаць Еўрапейская федэрацыя цяжкай атлетыкі, якая павінна будзе даслаць сваё афіцыйнае рашэнне. Па словах дзяржтрэнера, яно можа быць прынятае ўжо праз тыдзень. 

А вось на наступную Алімпіяду Андрэй Арамнаў усё ж зможа паехаць.

Міхаіл Захаранка: "Размаўлялі з прэзідэнтам Міжнароднай федэрацыі і з іншымі людзьмі. Яны ўсе сцвярджаюць, што да Алімпіяды дапушчаны будзе. Але гэта на сённяшні дзень, афіцыйна казаць пакуль рана, бо няма яшчэ канчатковага рашэння Міжнароднай федэрацыі".

Высветлілася, што ў крыві Андрэя знайшлі усё ж не з марыхуану, як пісалі многія беларускія СМІ, а… некалі легальны "спайс".

Міхаіл Захаранка: "Пішуць, што марыхуану курыў… Я вам дакладна скажу, што гэта не марыхуана. Гэта сінтэтычны канабіоід. Як я разумею, ёсць такія курыльныя сумесі, кшталту "спайса". Але ён праўду не кажа, з ім цяжка гаварыць, таму мы не ведаем дакладна, што ён паліў. Але гэта дакладна не марыхуана".

Што рабіць з таленавітым але недысцыплінаваным спартсменам трэнеры ўжо не ведаюць. 

Міхаіл Захаранка: "Словы на яго не дзейнічаюць. Ён не дзіцё, а дарослы чалавек. Ён павінен разумець, што робіць. Мы з ім размаўляем, але гэта не дае ніякага эфекту".

Праўда сам Андрэй нейкі сумны і стомлены. Ён вырашыў больш не размаўляць з прэсай.

"Я інтэрв'ю не дам. Я вырашыў больш нічога не казаць, усё роўна ахінею пішуць розную. Не буду нічога казаць, прабачце".