"Белтэлекам" шукае пастаўшчыка абсталявання для NGN-сетак

15/07/2007 - 11:17

Беларускі аператар "Белтэлекам" абвясціў сярод айчынных і замежных кампаній конкурс на пастаўку абсталявання для арганізацыі мультысэрвісных сетак сувязі NGN (Next Generation Network).

Прапановы па конкурсе прымаюцца да 14 жніўня 2007 года, яны павінны быць сапраўдныя на працягу 90 дзён пасля гэтай даты. "Белтэлекам" будзе выбіраць пастаўшчыка зыходзячы з умоў пастаўкі, мантажу і пуску ў эксплуатацыю абсталявання, навучання персаналу, а таксама далейшага гарантыйнага абслугоўвання сетак NGN, паведамляе "Прайм-ТАСС".

Пераможца конкурсу будзе абавязаны паставіць абсталяванне і праграмнае забеспячэнне паэтапна да першага-другога квартала 2008 года. За пастаўкі абсталявання "Белтэлекам" плануе разлічыцца уласнымі сродкамі ў беларускіх рублях або доларах.

Па азначэнні Міжнароднага саюза электрасувязі NGN – гэта сетка з камутацыяй пакетаў, здольная забяспечваць тэлекамунікацыйныя паслугі пры дапамозе шырокапалосных транспартных тэхналогій, якія падтрымліваюць такую якасць абслугоўвання, пры якой функцыянальнасць, што забяспечваецца, не залежыць ад выкарыстаных транспартных тэхналогій.