БХК патрабуе прызнаць выбары прэзідэнта несапраўднымі
"Беларускі Хельсінкскі камітэт" звярнуўся ў Вярхоўны Суд са скаргай пра прызнанне выбараў прэзідэнта Беларусі несапраўднымі.
На 24 старонках пералічваюцца факты, якія сведчаць пра найгрубейшыя парушэнні заканадаўства пры фармаванні тэрытарыяльных і ўчастковых выбарчых камісій, зборы подпісаў для вылучэння кандыдатаў у прэзідэнты, асвятленні выбараў у СМІ і агітацыі, датэрміновым галасаванні і ў асноўны дзень выбараў, паведамляе газета "Народная воля".
Беларускі Хельсінкскі камітэт лічыць, што шматлікія выпадкі парушэння заканадаўства, усталяваныя місіяй нацыянальнага назірання, паўплывалі на вынікі выбараў у цэлым па краіне. А таму, кіруючыся Канстытуцыяй і палажэннямі Выбарчага кодэкса, просіць Вярхоўны Суд Рэспублікі Беларусь прызнаць прэзідэнцкія выбары несапраўднымі.
