Брэсцкі Свабодны тэатр адзначыў 10-я ўгодкі
Тэатр называецца так, бо выступае на падмостках клуба на Вульцы, а Вулька таму Вулька, што была маленькай такой Воляй, слабодкай сярэдневечнага горада
Увечары 7 сакавіка Свабодны тэатр паказаў даўнім сябрам і неафітам урыўкі са сваіх галоўных індор-спектакляў, дыялогава паразмаўляў пра сённяшні дзень і будучыню і парадаваў падарункам — фаер-шоў.
Прынамсі, нагадалі пра “самы наведваны” (рэжысёрка Аксана Гайко) спектакль “Тавар-грошы-тавар” і “Працэс” паводле Франца Кафкі. Акцёры і сябры тэатра чыталі вершы, а “вялікі сябар” Вова сказаў усю праўду: “Што б мы рабілі без Свабоднага? Тэлік глядзелі б, як усе.”
Таксама зладзілі продаж фірменных сувеніраў, паштовак ды календароў.
Тэатру пажадалі сваіх падмосткаў. Пажаданне надзённае: клуб на Вульцы зачыняецца на рамонт. Нібыта Свабодны абяцаў узяць на сваю сцэну новы клуб у мікрараёне Паўднёвы.
Сустрэча, якая доўжылася каля 4 гадзін, прыцягнула ўвагу каля 200 чалавек.
