Эмінэма называюць фанершчыкам

Рэпер Эмінэм апынуўся ў цэнтры «фанернага» скандалу.  Шатландскія прыхільнікі хіп-хоп-выканаўцы абвінавацілі яго ў выкарыстанні вакальнай фанаграмы падчас выступу на фэсце T In The Park 11 ліпеня. Шоў у межах T In The Park стала першым паўнавартасным канцэртам Эмінэма ў Вялікабрытаніі з 2004-га года.

Двухгадзінны сэт рэпера складаўся прыкладна з трыццаці песень – ад першых хітоў да матэрыялу апошняга на сёння альбома «Recovery». Аднак, як лічаць фэны, далёка не ўсе песні Эмінэм выконваў нажыва. Часам яго мікрафон быў выключаны, а на бэкграўндзе гучаў запісаны голас.

Частка прысутных не ўгледзела ў гэтым ніякага крыміналу, маўляў, многія артысты выкарыстоўваюць на сваіх канцэртах «падкладку» ў выглядзе бэк-вакалу. Іншыя ж абвінавацілі Эмінэма ў ашуканстве, справядліва заўважыўшы, што «сапраўдныя» рэперы ніколі не карыстаюцца такімі хітрыкамі – каб не прыпадабняцца да поп-зорак кшталту Брытні Спірс.

Менеджмент Эмінэма пакуль ніяк не каментуе гэтыя абвінавачванні.

Адзначым, што выступ выканаўцы на T In The Park да апошняга моманту заставаўся пад пытаннем з-за нейкіх «праблем» невядомага характару.

Фота: askmen.com