Еўрасаюз уводзіць “блакітную карту” для працоўных

Еўрасаюз адкрывае свой рынак для высокакваліфікаванай працоўнай сілы з краінаў, якія не ўваходзяць у ЕС.

Пра гэта заявіў камісар Еўракамісіі па пытаннях юстыцыі, свабоды і бяспекі Франка Фраціні, перадае ИТАР-ТАСС. Ён паведаміў, што ў Еўрасаюзе ўводзіцца так званая “блакітная карта”, якая дае магчымасць яе ўладальніку працаваць на ўсёй прасторы ЕС.

Адпаведнае заканадаўства будзе прад’яўленае Еўракамісіяй на зацвярджэнне міністраў унутраных справаў ЕС у верасні. “Блакітная карта” павінная дапамагчы ў вырашэнні праблемы недахопу высокакваліфікаваных кадраў у шэрагу галінаў эканомікі і сацыяльнага забеспячэння ЕС.

Плануецца прыцягваць урачоў, інжынераў, навукоўцаў-даследчыкаў, спецыялістаў у галіне кампьютарнай тэхнікі. Уладальнік “блакітнай карты” зможа по завяршэнні фіксаванага кантракту ў адной з краінаў ЕС, пераязджаць ў іншую ў выпадку з’яўлення вакансіі.

Аднак новы дакумент не дае права на сталае жыхарства ў Еўрасаюзе і на неабмежаваны па часе працоўны кантракт. “Блакітная карта” будзе сапраўднай напрацягу пяці гадоў пасля вяртання працаўніка з ЕС на радзіму.

У любы момант ён можа вярнуцца ў Еўрасаюз, калі для яго з’явіцца вакансія, паведаміў Фраціні.