Кітайскі юань уключаны ў склад рэзервовых валют Нацбанка Беларусі

Рэзервовай валютай Нацбанка Беларусі стаў кітайскі юань. Уключэнне актываў у кітайскіх юанях у разлік паказчыка міжнародных рэзервовых актываў Беларусі ў нацыянальным вызначэнні абумоўлена як тэмпамі росту кітайскай эканомікі і павелічэннем удзельнай вагі ў структуры сусветнага гандлю, так і значным пашырэннем двухбаковых эканамічных узаемаадносінаў паміж Беларуссю і Кітаем.

У прэс-службе Нацбанка адзначаюць, што ў бліжэйшай будучыні чакаецца значны рост таваразвароту паміж Беларуссю і Кітаем. Па выніках сямі месяцаў 2007 года ён склаў ужо 692 мільёна долараў, што на 80% больш у параўнанні з аналагічным перыядам мінулага года.

БелаПАН