Літва заклікае дапусціць назіральнікаў на палітычныя працэсы
МЗС Літвы падтрымаў намеры БДІПЧ АБСЕ накіраваць назіральнікаў у Мінск з мэтай назірання за судовымі працэсамі.
Пра гэта сёння паведамляе прэс-служба МЗС Літвы са спасылкай на заяву міністра замежных справаў Аўдронюса Ажубаліса.
Ажубаліс выказаў глыбокую занепакоенасць у сувязі з пачаткам гэтых працэсаў і заклікаў улады Беларусі гарантаваць магчымасць міжнароднага назірання за судовымі працэсамі над удзельнікамі масавых акцый пратэста 19 снежня.
"Я хацеў бы падкрэсліць, што свабода сходаў з'яўляецца адным з асноўных дэмакратычных правоў. Я таксама заклапочаны паведамленнямі пра шматлікіх адвакатаў абароны, у якіх анулявалі ліцэнзіі. У будучыні АБСЕ мусіць назіраць за такімі працэсамі і даваць незалежную ацэнку нашым дзяржавам-удзельнікам", — заявіў Ажубаліс.
Ён таксама адзначыў, што ўсе дзяржавы-ўдзельнікі АБСЕ ўзялі на сябе абавязак дапускаць назіральнікаў на паседжанні суда.
