Міліцыянты выклікаюць на допыт пратэстантаў
Увечары 11 студзеня да пратэстанцкага пастара з Навагрудка Уладзіміра Качагура дадому прыйшлі двое невядомых людзей у цывільным і двое міліцыянтаў.
Яны спрабавалі уручыць пастару позву на допыт у міліцыю.
Дапытваць Качагура збіраліся пра пікет у падтрымку кандыдата ў прэзідэнты Віталя Рымашэўскага: маўляў, падчас выбарчай кампаніі ён быў праведзены з парушэннем заканадаўства. Арганізатарамі пікета былі пратэстанцкія вернікі.
Пастар адмовіўся падпісваць позву. Тады міліцыянты паспрабавалі ціснуць на тое, што Качагур адмаўляецца браць позву пры сведках. Пастар не стаў далей размаўляць з міліцыянерамі і зачыніў дзверы.
Тыя ж міліцыянты ўвечары прыйшлі да пратэстанта Сяргея Ваўчка. Аднак уручыць позву не змаглі, бо Сяргея не было дома.
Позву на допыт па гэтай справе Качагуру і яшчэ некалькім пратэстантам спрабавалі ўручыць яшчэ 4 студзеня, але тады яны таксама адмовіліся яе прымаць.
