Нацыянальныя візы краін Еўрасаюза могуь стаць бясплатнымі для беларусаў

Кааліцыя "За Еўрапейскі кантынент без візавых бар'ераў" заклікала ўрады ўсіх краін — членаў Еўрасаюза і інстытуты ЕС пераняць прыклад Польшчы і адмовіцца ад збораў за афармленне і выдачу нацыянальных віз для грамадзян Беларусі.

“Рэпрэсіўныя дзеянні беларускага ўрада супраць сваіх грамадзян больш не могуць разглядацца ў якасці ўнутранай справы і патрабуюць сумесных дзеянняў з боку ўсіх дзяржаў — членаў ЕС і інстытутаў ЕС”, — гаворыцца ў звароце.

Аўтары звароту ўпэўненыя, што візавая палітыка з'яўляецца адным з лепшых інструментаў для выказвання салідарнасці з беларускім грамадствам.

Кааліцыя таксама заклікала адрасатаў звароту аднавіць папярэднія і ўвесці дадатковыя візавыя санкцыі ў дачыненні да беларускіх чыноўнікаў, прадстаўнікоў праваахоўных і судовых органаў, якія ўдзельнічалі ў гвалце супраць удзельнікаў дэманстрацыі 19 снежня 2010 года і масавых парушэннях правоў чалавека, а таксама адказных за гэтыя дзеянні.

Разам з тым аўтары звароту адзначаюць, што выбарачныя санкцыі ў дачыненні да дзяржаўных чыноўнікаў не павінны парушыць дабрабыт простых грамадзян краіны.

Зварот змяшчае заклік захаваць перспектыву бязвізавага рэжыму для Беларусі (як гэта прадугледжана ў рамках праграмы “Усходняе партнёрства”) і падтрымаць перамовы па пагадненні аб спрашчэнні візавага рэжыму.

Нагадаем, кааліцыя “За Еўрапейскі кантынент без візавых бар'ераў” была створана ў Варшаве ў лістападзе 2010 года. Мемарандум аб стварэнні кааліцыі падпісалі шэраг арганізацый з Азербайджана, Арменіі, Балгарыі, Беларусі, Бельгіі, Грузіі, Літвы, Малдовы, Польшчы, Славакіі, Украіны, Чэхіі і Швецыі, у тым ліку "Офіс за дэмакратычную Беларусь" і аддзяленні інстытута "Адкрытае грамадства".