Падчас вайны не да нас? Беларусы маюць права размаўляць пра свае праблемы

Беларусы маюць права размаўляць пра свае праблемы, нават калі ідзе вайна і, здавалася б, не да “беларускага пытання”. Сваімі думкамі пра пачуццё віны перад украінцамі ў эфіры Еўрарадыё падзялілася Крысціна Дробыш, акторка і адна з аўтарак антыкрызіснага ток-шоу “Трэба пагаварыць”.

— Гэта вельмі складанае пытанне і для мяне таксама, бо я знаходжуся ў гэтым кожны дзень. І напэўна, з лютага з’явілася гэтае пачуццё віны. І было незразумела, што рабіць: ці прымаць гэтыя ўдары, ці даваць здачы. Цяпер магу сказаць: так, даваць здачы. Бо мы крычалі з 2020-га году актыўна. Але палітзняволеныя былі і да 20-га году: і прысуды, і затрыманні. У 2020-м гэта стала відавочна для большасці. Мы крычалі пра гэта. Ніхто гэтага не бачыў. Пасля 24 лютага ўбачылі толькі адно: з вашай краіны ляцяць ракеты.    

Дробыш звяртае ўвагу на тое, што многія ўкраінцы не заўважалі таго, што насамрэч адбывалася ў Беларусі:

—  Я памятаю, як летам мінулага году я ехала ў Кіеве і размаўляла з таксістамі — галоўнымі палітолагамі любой краіны. І яны мне расказвалі пра тое, як усё ў нас было куплена ў жніўні 2020-га. Сума, якую называлі, падазрона супадала з сумай, якую ён называў за ўдзел у Майдане. І казалі, што мы, маўляў, усё перабольшваем. І ім даказваеш-даказваеш, а потым чуеш: “Ну дык вы не даціснулі”.

Пры гэтым людзі згадваюць, як у свой час Расія, выкарыстоўваючы ўкраінскія парты, нападала на Малдову і Грузію. А пра гэта ніхто не згадвае. Ва Украіне ніхто тады не пратэставаў. У Беларусі ж, ведаючы, што ім за гэта будзе, людзі ж выйшлі: і ў Мінску, і па ўсёй Беларусі.