Падчас здачы ЦЭ з аўдыторый выдалілі дзевяць чалавек
Іспыты, ілюстрацыйнае фота
26 траўня ў Беларусі 11-класнікі здавалі цэнтралізаваны экзамен (ЦЭ), а выпускнікі мінулых гадоў пісалі ЦТ.
На ЦЭ сёлета зарэгістравалася 59 080 чалавек, але прыйшлі на яго толькі 58 874 выпускнікі, паведамляе Мінадукацыі. Асноўнай прычынай няяўкі называюць хваробы і ўдзел у спартыўных спаборніцтвах. Двух абітурыентаў не пусцілі на ЦЭ, бо яны забыліся ўзяць з сабой пашпарты.
Найбольшая колькасць выпускнікоў запісалася на ЦЭ па матэматыцы — 19,4 тысячы чалавек. На другім месцы грамадазнаўства — 12 611 выпускнікоў. Тройку лідараў замыкае біялогія, на якую запісаліся 11 873 адзінаццацікласнікаў.
Дарэчы, 702 чалавекі былі вызваленыя ад экзаменаў. Сярод іх 338 чалавек, якія навучаліся дома і 197 пераможцаў рэспубліканскіх алімпіядаў. Яшчэ 167 выпускнікоў атрымалі вызваленне паводле медыцынскіх паказанняў.
За выкарыстанне тэлефонаў ды іншай тэхнікі былі выдаленыя з аўдыторый 9 чалавек. А 15 адзінаццацікласнікаў не змаглі завяршыць экзамен праз дрэнны стан здароўя.
