Першакласнік Коля Лукашенка пакуль будзе без школьнага басейна?

Будаўнікі кажуць, быццам ад басейна адмовіліся “ў сувязі з тым, што сродкаў няма”. Але, магчыма, сын прэзідэнта пойдзе не ў астрашыцкую школу У Астрашыцкай школе, дзе, магчыма, будзе вучыцца сын прэзідэнта Аляксандра Лукашэнкі —  ніякага ажыятажу сярод першакласнікаў. Спецыяліст па малодшых класах раённага аддзела адукацыі Мінскага райвыканкама Галіна Дубовік за тыдзень да 1 верасня нечакана гаворыць нам, што будаўнікі завершаць пакуль толькі частку рамонта. Тая ж частка, у якой мусяць вучыцца першакласнікі, будзе гатовая не раней чым праз два месяцы.

Галіна Дубовік: “Там ідзе рамонт поўным ходам. Пакуль рамонт пачатковых класаў не зроблены, і яны будуць вучыцца на базе дашкольных устаноў. Кажуць, што зробяць толькі адзін блок, а ўжо да лістапада —  усё астатняе. Школа будзе вельмі добрая, з басейнам”.

Еўрарадыё: Там будзе вучыцца сын прэзідэнта?

Галіна Дубовік: “Гэтага ніхто не ведае”.

Еўрарадыё: Трапіць у першы клас зараз ці можна? Месцы ёсць?

Галіна Дубовік: “Можна можна, набор пакуль ідзе. Няма там ніякага ажыятажу”.

Еўрарадыё: А замежную мову ў школе будуць вучыць з першага класу?

Галіна Дубовік: "З трэцяга, але факультатыў, магчыма, будзе і з першага, мы пакуль запыт яшчэ не рабілі".

На прадпрыемстве "Белкомплекспраект" за рамонт Астрашыцкай школы адказвае Аляксандр Луцкін. Ён упэўнены, што школа будзе гатовая праз тыдзень.

Аляксандр Луцкін: “Школа “здаецца” 27 жніўня. Для першакласнікаў там другі блок, спецыяльны, дзе яны мусяць жыць, спаць. Я ўчора там быў – мыюць ужо  вокны. Заканчваюць добраўпарадкаванне ва ўнутраным дворыку: нават кветкі і кусты нейкія садзяць. На планёрцы казалі, што 27 жніўня плануецца “ўвод” школы”.

А вось басейна ў школе пакуль не будзе — гэты праект чамусьці “замарозілі”.

Аляксандр Луцкін: “У сувязі з тым, што сродкаў няма, плануецца басейн не будаваць сёлета. Я не ведаю, урэзалі ці не далі сродкі. Я ведаю, што басейн запраектаваны - яго рабілі ў “Мінскграмадзпраекце”. Але быў потым ліст, каб будоўлю басейна не вялі”.

У астанім, школа нічым не адрозніваецца ад сучасных звычайных навучальных устаноў.

Аляксандр Луцкін: “Абавязкова будуць камп’ютарныя класы, музычнае суправаджэнне... Усё там будзе. Па сучасных нормах гэта ўсё звычайнае. Я думаю, што яна не надта адрозніваецца ад школы, якая зроблена па сённяшніх патрабаваннях”.

На пытанне, ці сапраўды ў першы клас менавіта гэтай школы прыйдзе Коля Лукашэнка, Луцкін адказаў з гумарам.

Аляксандр Луцкін: “У заданні на праектаванне такога няма, што ён будзе там вучыцца. Я — не ведаю”.

Фота —  gazetaby.com