Пінскі ільнозавод ліквідуюць

Брэсцкі абласны гаспадарчы суд прыняў рашэнне пра ліквідацыю Пінскага ільнозавода. Пра гэта паведамляе газета "Заря".

Завод апынуўся ў складаным фінансавым становішчы яшчэ ў 1990-я. Да крызісу прывялі нізкая якасць сыравіны і недахоп тэхнікі ў перыяд уборкі ільну, гадоўляй і ўборкай якога займаўся сам завод, а таксама няпоўнае выкарыстанне вытворчых магутнасцяў.

Заява пра банкруцтва акцыянернага таварыства паступіла ў суд яшчэ ў жніўні мінулага года. Працэдура банкруцтва доўжылася амаль восем месяцаў. За гэты час было даказана, што неплацежаздольнасць прадпрыемства носіць устойлівы характар – на снежань мінулага года сума даўгоў завода склала 2,5 мільярда рублёў. Разлічыцца па фінансавых абавязальніцтвах завод не здолеў бы.